ஆரோக்கியமான மண்ணே ஆரோக்கியமான உணவு

ஒரு கைப்பிடி வளமான மண்ணில் கோடிக்கணக்கான நுண்ணுயிர்கள் வாழ்கின்றன. அவைதான் இலை தழைகளையும் சாணத்தையும் சிதைத்து, செடிகள் எடுத்துக்கொள்ளும் சத்துக்களாக மாற்றுகின்றன. மண் உயிருடன் இருந்தால்தான் பயிர்களும் நலமாக இருக்கும்.

மண் சோர்வடைவது ஏன்?

தொடர்ந்து ஒரே பயிர் சாகுபடி, அதிக ரசாயன உரம், மண்ணை வெறுமையாக விடுதல், பயிர்க் கழிவுகளை எரித்தல் ஆகியவற்றால் மண்ணில் கரிமச் சத்து குறைகிறது. மண் கெட்டியாகி, நீரைத் தேக்காமல் போகிறது.

மண்ணை உயிர்ப்பிக்க எளிய வழிகள்

• மண்புழு உரம், தொழு உரம்: மண்ணுக்குத் தேவையான கரிமச் சத்தைத் தருகின்றன.
• மூடாக்கு (Mulching): காய்ந்த இலைகள், வைக்கோல் கொண்டு மண்ணை மூடினால் ஈரம் காக்கப்படும்; நுண்ணுயிர்கள் பெருகும்.
• பயிர் சுழற்சி: ஒரே பயிரை மீண்டும் மீண்டும் பயிரிடாமல், பருப்பு வகைகளை இடையில் பயிரிட்டால் மண்ணில் நைட்ரஜன் சேரும்.
• பசுந்தாள் உரம்: சணப்பை, தக்கைப்பூண்டு போன்றவற்றை வளர்த்து மண்ணில் மடக்கி உழலாம்.
• ஜீவாமிர்தம், E.M. கரைசல்: மண்ணில் நன்மை செய்யும் நுண்ணுயிர்களைப் பெருக்குகின்றன. (செய்முறை எங்கள் வலைப்பதிவில் உள்ளது.)
• பயிர்க் கழிவுகளை எரிக்காதீர்கள்: அவற்றை உரமாக்குங்கள்.

வீட்டிலேயே தொடங்கலாம்

காய்கறித் தோல், டீத்தூள், முட்டை ஓடு போன்ற சமையலறைக் கழிவுகளை ஒரு தொட்டியில் சேர்த்து, சிறிது மண் தூவி, இரண்டு மூன்று மாதங்களில் நல்ல உரமாக்கலாம். அதை உங்கள் மாடித் தோட்டத்துக்குப் பயன்படுத்துங்கள்.

நல்ல மண் → நல்ல பயிர் → நல்ல உணவு → நல்ல உடல்நலம். இந்தச் சங்கிலியின் முதல் கண்ணி மண்தான்.