சுத்தமான தேன்: தேர்ந்தெடுப்பது, பயன்படுத்துவது, சேமிப்பது

தேன் இயற்கை நமக்குக் கொடுத்த இனிப்பு. ஆனால் சந்தையில் கிடைக்கும் எல்லாத் தேனும் ஒன்றல்ல.

பச்சைத் தேன் (Raw Honey) என்றால் என்ன?

தேன் கூட்டிலிருந்து எடுத்து, அதிகமாகச் சூடாக்காமல், அதிகமாக வடிகட்டாமல் பாட்டிலில் அடைக்கப்படும் தேனே பச்சைத் தேன். இதில் தேனின் இயற்கையான மணமும் சுவையும் அப்படியே இருக்கும்.

தேன் உறைவது கலப்படத்தின் அடையாளமா?

இல்லை. சுத்தமான தேன் குளிர்ச்சியான காலத்தில் உறைந்து, சர்க்கரை போலக் கட்டியாவது (crystallisation) இயல்பான ஒன்று. பாட்டிலை வெதுவெதுப்பான நீரில் சிறிது நேரம் வைத்தால் மீண்டும் திரவமாகிவிடும். நேரடியாக அடுப்பில் வைத்துச் சூடாக்க வேண்டாம்.

“தண்ணீரில் சொட்டு விட்டுப் பார்க்கும்” சோதனைகள்

வீட்டில் செய்யப்படும் இது போன்ற சோதனைகள் தேனின் சுத்தத்தை உறுதியாகச் சொல்லாது. நம்பகமான விவசாயி அல்லது நிறுவனத்திடமிருந்து வாங்குவதே சிறந்த வழி.

எப்படிப் பயன்படுத்தலாம்?

• வெதுவெதுப்பான (சூடான அல்ல) நீர் அல்லது எலுமிச்சைச் சாறுடன்.
• தோசை, சப்பாத்தி, பழங்களுடன்.
• சுக்கு காபி, மூலிகைத் தேநீருக்கு இனிப்பாக (சூடு சற்றுக் குறைந்த பிறகு சேர்க்கவும்).

முக்கியக் குறிப்புகள்

• ஒரு வயதுக்குக் குறைவான குழந்தைகளுக்குத் தேன் கொடுக்கக்கூடாது.
• தேனும் சர்க்கரை வகைதான்; நீரிழிவு உள்ளவர்கள் மருத்துவரிடம் ஆலோசிக்கவும்.
• ஈரமான கரண்டியைப் பாட்டிலில் போட வேண்டாம்; மூடியை இறுக்கமாக மூடி வைக்கவும்.

மலர் ஆர்கானிக் ஃபார்மின் தேன், எங்கள் பண்ணைத் தேன் கூடுகளிலிருந்து சூடாக்காமல், வடிகட்டாமல் பாட்டிலில் அடைக்கப்படுகிறது.